QBD prezantohet në Seminarin XV Mbarëkombëtar të Mësimit Plotësues të Gjuhës Shqipe dhe Kulturës Shqiptare në Diasporë në Prizren

QBD prezantohet në Seminarin XV Mbarëkombëtar të Mësimit Plotësues të Gjuhës Shqipe dhe Kulturës Shqiptare në Diasporë në Prizren

 

 

Sot, në Seminarin XV Mbarëkombëtar të Mësimit Plotësues të Gjuhës Shqipe dhe Kulturës Shqiptare në Diasporë që po zhvillohet në Prizren, Qendra e Botimeve për Diasporën prezantoi politikat shtetërore në ndihmesë të mësimdhënies në Diasporë, vizionin, nismat dhe punën e saj të bërë gjer më tani.
Në fjalën e saj drejtoresha e Qendrës së Botimeve për Diasporën, Znj. Mimoza Hysa tha se “Qendra e Botimeve për Diasporën është një qendër e re, dhe si çdo gjë e re duket sikur i mungon historia, e shkuara dhe ka vetëm privilegjin e të ardhmes, të parashtrimit të synimeve e të dëshirave, por fakti që paraqitemi para jush sot me strategji të hartuara, me programe të strukturuara, me manuale të botuara, me projekte të nisura tashmë, është gjysma e punës. Pjesën tjetër, atë më të vështirën do ta përshkojmë së bashku”.
Më tej ajo u shpreh se bashkëpunimi do të jetë baza e punës dhe gjithçka do të arrihet në të ardhmen.
Gjithashtu, ajo parashtroi para mësuesve misionin dhe vizionin e Qendrës së Botimeve për Diasporën, hapat e ndërmarrë deri tani në ndihmesë të hartimit të teksteve të reja të përbashkëta për mësimdhënien në Diasporë, si dhe projektet e tjera të ndërmarra në shërbim të ruajtjes dhe përhapjes së gjuhës dhe kulturës shqiptare jashtë vendit.