Në mbështetje të vendimit nr. 469, datë 26.07.2018, të Këshillit të Ministrave “Për krijimin, organizimin dhe funksionimin e Qendrës së Botimeve për Diasporën”, i ndryshuar, si dhe marrëveshjes së bashkëpunimit të lidhur ndërmjet AKD-së me nr. 66/1 Prot., datë 18.04.2024 dhe QBD-së me nr.71 Prot., datë 18.04.2024,“Për promovimin dhe ruajtjen e trashëgimisë kulturore dhe gjuhës shqipe në diasporë”, Aneks marrëveshjes lidhur ndërmjet AKD-së dhe QBD-së me nr.102 Prot., datë 21.05.2025 (AKD) dhe nr.65 Prot., datë 21.05.2025 (QBD) pika 5, kreu II, shkronja “d” sipas së cilës Qendra e Botimeve për Diasporën është përgjegjëse për përzgjedhjen e mësuesëve dhe bashkëpunëtorëve nga Shqipëria që do të zhvillojnë orët  mësimore në Programin “Jam shqiptar”, si dhe bazuar në kërkesen nr. 117, Prot., datë 26.06.2026, Qendra e Botimeve për Diasporën (QBD) shpall ftesën për konkurrim për përzgjedhjen e një bashkëpunëtori të jashtëm experti / mësuesi, në kuadër të zbatimit të programit të Shkollës Verore “Jam shqiptar” si një program edukativ dhe kulturor që synon forcimin e identitetit kombëtar, promovimin e gjuhës shqipe, historisë, kulturës dhe trashëgimisë kombëtare te fëmijët dhe të rinjtë shqiptarë që jetojnë jashtë vendit.

 

Janë të ftuar të aplikojnë të gjithë personat që plotësojnë kërkesat e mëposhtme.

Kërkesa të përgjithshme:
  • Të jetë shtetas shqiptar;
  • Të ketë zotësi të plotë për të vepruar;
  • Të ketë përfunduar arsimin e lartë në fushën e mësuesisë, gjuhës shqipe, historisë, kulturës, trashëgimisë kulturore ose në fusha të tjera të përafërta;
  • Të ketë jo më pak se 5 (pesë) vite përvojë profesionale në fushën e arsimit, mësimdhënies, kërkimit shkencor ose aktiviteteve edukative dhe kulturore;
  • Të ketë përvojë të dëshmuar në zhvillimin e proceseve mësimore ose trajnimeve;
  • Të mos jetë i dënuar me vendim gjyqësor të formës së prerë dhe të mos jetë në ndjekje penale;
  • Të zotërojë shumë mirë programet bazë kompjuterike dhe mjetet digjitale të mësimdhënies;
  • Të ketë njohuri të thelluara mbi gjuhën shqipe, historinë, kulturën dhe trashëgiminë kombëtare shqiptare;
  • Të ketë aftësi të mira komunikimi, organizimi dhe pune në grup;
  • Të ketë aftësi për të punuar me fëmijë dhe të rinj në mjedise shumëkulturore;
  • Përvoja në mësimdhënien e gjuhës shqipe në diasporë, pjesëmarrja në projekte kombëtare ose ndërkombëtare në fushën e arsimit dhe botimet ose publikimet shkencore në fushën përkatëse përbëjnë avantazh.
Kërkesa të veçanta:
  • Të zhvillojë procesin mësimor në përputhje me programin dhe objektivat e Shkollës Verore “Jam shqiptar”;
  • Të hartojë dhe të zbatojë metoda bashkëkohore të mësimdhënies, të përshtatura sipas grupmoshave të pjesëmarrësve;
  • Të përgatisë materiale didaktike dhe edukative për zhvillimin e aktiviteteve mësimore;
  • Të zhvillojë aktivitete që promovojnë gjuhën shqipe, historinë, kulturën dhe trashëgiminë kombëtare;
  • Të bashkëpunojë me koordinatorët, ekspertët dhe stafin organizativ për mbarëvajtjen e programit;
  • Të respektojë afatet, programin ditor dhe rregullat organizative të Shkollës Verore;
Dokumentet e nevojshme për kandidatin/kandidaten, që të pranohet në konkurrim, duhet të jenë si më poshtë:
  1. Jetëshkrimi (CV);
  2. Fotokopje e kartës së identitetit;
  3. Fotokopje e diplomës së arsimit të lartë;
Afati i fundit për dorëzimin e dokumenteve për pjesëmarrje në konkurrim është data 06.07.2026.
Dokumentet duhen dërguar në adresën e emailit të QBD-së: info@qbd.gov.al.
Në përfundim të vlerësimit të kandidatëve, Qendra e Botimeve për Diasporën do t’i njoftojë kandidatët pjesëmarrës në konkurrim individualisht nëpërmjet adresës së emailit.